Gjatë kohës kur ish-kryeministri Sali Berisha po fliste në “çadrën e lirisë”, një qytetare tentoi të merrte mikrofonin, ndërsa thërriste “Rroftë Edi Rama”, duke shënuar incident. Protestuesit reaguan dhunshëm ndaj saj, por ndërhyrja e deputetes Majlinda Bregu shmangu përplasjet fizike.

Bashkëbisedimi i deputetëve demokratë me qyetarët shënoi një incident gjatë ditës së sotme, kur një qytetare tentoi ti marrë mikrofonin ish-kryeministrit Berisha, ndërsa ndërhyte gjatë fjalës së tij, duke thirrur “Rroftë Edi Rama”, apo duke iu drejtuar ish-kryeministrit me fjalët “Na ke marrë shpirtin”.

Protestuesit e zhvendosën qytetaren, ndërsa jashtë çadrës reaguan dhunshëm ndaj saj.
Por në një kohë kur protestuesit tentuan ta sulmonin fizikisht, deputetja Majlinda Bregu ndërhyri, duke shmangur dhunën ndërsa e shoqëroi qytetaren deri tek forcat e policisë.

Gruaja që krijoi incident në protestën e Partisë Demokratike është Eklarina Hoxha nga qyteti i Vlorës e cila u shoqërua nga policia në komisariatin numër 1 për tu marrë në pyetje.